குற்றங்களின் நிராகரிப்பைச்
சுவைக்கும் அருவச் சாத்தானின்
நீண்ட காத்திருப்பில் ..
முன்னிரவினை விழுங்கிய
அரவத்தின் சொற்படிமங்களில் ..
பதில்கள் மறுக்கப்பட்ட
கேள்விகள் மட்டும் ,
இருளில் ரீங்கரிக்கும் விட்டில்களுடன்
ஓயாமல் இரைந்து கொண்டிருந்தன !
பட்டாம்பூச்சியின் சிறகை விரித்து
அவள் ..
அன்றும் அப்படித்தான் ஆடையணிந்தாள் ;
கண்களற்ற ஓவியத்திற்க்கு
வண்ணம் தீட்டினாள் ;
பாசமுடன் அப்பாவுக்கு
தன் கடைசி முத்தமிட்டாள் !
பெருவனத்தில்
தனித்த நெடுமரத்தின் மௌனத்தை
கடக்கும் நொடிகளில் ,
தொடுவானில் கரைகிறது
அர்த்தநாரிப் பறவையொன்றின்
துயரப் பாடல் !
கொடுங்கனாவொன்று
களையும் வேளையில்
அந்தப் பட்டாம்பூச்சிகளின்
சிறகு முறியும்போது ..
உயிருள்ள பொம்மைகள்
எதுவுமே தலையாட்டுவதில்லை !
- நா. அருண் வாசகன்
No comments:
Post a Comment