ஆதலால் ....தம்பி உடையோன்...

உணர்வுகளை பகிர்ந்து கொள்ள 

நண்பனுக்கோ அல்லது காதலிக்கோ 

தேவை இருக்காது ...

நீங்கள் மறந்தாலும் 

வருடம் தவறாமல் 

பிறந்த நாள் புதுச் சட்டை வந்து சேரும் ..

சில வாரக் கடைசிகளின் பயணங்களில் 

பதிவுகளற்ற ரயில்பெட்டியிலும் 

உங்களுக்கான இருக்கை

சௌகரியமாய் வாய்த்திருக்கும்...

பழைய துணிகள் யாவும் 

மீண்டுமொருமுறை புதுப்பிக்கப்படும் ..

வீட்டுப் புதுவரவுகளில் 

நிச்சயம் இந்தக் கையொப்பம் இருக்கும் ..

அப்பா ...மிக நெருங்கிய நண்பன் கிடைத்தாய் 

 மனதுக்குள் குதூகலிப்பார் ...

அம்மாவுக்கு மீண்டுமொரு 

மாமியார் சண்டை காத்திருக்கும்..

குடும்பத்தலைவன் சாயலப்பிக்கொள்ளும் 

ஒத்திகை நிதம் அரங்கேறும் ...

ஒரு தேநீர் கடை 

கடற்கரை 

அல்லது சாலையோரச் சுவர் போதும் 

உலகத்தை ஏறக்குறைய அலசி விடலாம் ...

விரட்டிச் செல்லும் நிமிடங்களில் 

சிலவற்றை இவனுடன் ஒதுக்கிப் பாருங்கள் 

உங்களுக்கான ஒட்டு மொத்த சமுதாயத்தின் ஒற்றை நிழல் 

ஒரு நாய் குட்டி போல் பின் தொடர்ந்து கொண்டிருக்கும் ...

................சிறகு

ஒரு புனிதத்தின் எதிர் இருக்கையில்

நெட்ட நெடுஞ்சாலையின் வெறித்த பார்வையில் 

வெம்மை துண்டங்களை ஒரு சேர கிரகித்து துப்பும் துளிகளில் 

ஓலமிட்டு ஓய்ந்து தள்ளும் நீலபெருங்கடலில் 

கர்வத்தில் ஓங்கி உயரும்  பெருமலையில் 

பகலின் முடிவில் சிதறித்தொங்கும் பிரபஞ்சத்துகளில் 

எங்கு சென்று தேட 

அர்த்தங்களற்ற பொழுதுகளில் தொலைத்த 

ஒற்றைச் சிறகினை ..

அட ..

ஃ பெதர் டச் திரையை

தொட்டு விளையாடுகிறாள்

ஒரு தேவதை ...

ஒவ்வொரு முறையும்

வண்ணத்துபூச்சியாகிவிடுகிறது.....

செல் ஃபோன் .....

தெரியாமல் .....

சொல்ல நினைக்கும்

வார்த்தைகளுக்காக

ஒவ்வொரு முறையும்

ஃ பீனிக்ஸ் பறவையின்

இறகினை கடன் வாங்கிக் கொள்கிறேன் ....

ஒரு கார்ப்பரேட் இரவிலிருந்து ....

விண்டோஸ் வால்பேப்பர் வழியாக

தொடங்குகிறது ஒரு புரிதலின் நுழைவாயில் ...

தொடுவானம் வரை விரிந்த புல்வெளியில்

மிளிர்ந்த சிரிப்பின் அடையாளமும்

நினைவுப் பொதிமூட்டைகளும்

பதிவுகள் நிரம்பி வழியும் மௌனமும்

பால்யத்தில் படித்த டாஃபடில்ஸ் மலரிலோ ..

சமவெளியின் பின்னிருப்பதாய் தோன்றும் சிற்றோடையிலோ ..

ஒரு குட்டி தேவதையின் கைகளால்

ரகசியமாய் ஒளித்து வைக்கப்பட்டிருக்கிறது ...


வியாபித்து விரியும் போதி மரத்தின் இலைத்திட்டுகளில்

கருணையின் பரிசுகளும் ..

அது சார்ந்த காத்திருப்பின் தடயங்களும்

சில துளிகளாக சேர்த்து வைக்கப்பட்டிருக்கிறது ...


இனியெப்போதும்

நீர்த்துப் போன சோகங்களையும்..

வார்த்தைகளின் வியாபாரப் பிதற்றல்களையும்...

அர்த்தமற்ற வாழ்வினையும் குப்பையில் போடுங்கள் ...


ஒரு கர்ஸரின் தியானத்திலும் கூட

இந்த பிரபஞ்சமே இருண்டு விடக் கூடும் …

கயமையின் இட்டு நிரப்புதல்

ஆரம் ....!!!!

எனக்கு அன்று பிறப்பில்லை
வட்டத்தின் ஆரம் முடிவிலி

சில நூறு கோடி தாண்டிப் புணர்தலில் கருவானேன்
வட்டத்தின் ஆரம் கணக்கிடப்பட்டது

இருத்தல் போதுமென மோதிக் கிழித்து  வெளியானேன்
வட்டத்தின் ஆரம் சுருங்கியது

மானுடம் பயின்று  பகிரவும் செய்தேன்
வட்டத்தின் ஆரம்  குறைந்தது

நாட்காட்டி தீர்ந்த பின் பயணப்பட்டேன்
ஆரமும் வட்டமும் ஒன்றாய் புணர்ந்தது

கடைசியில் மீண்டும் நான் ஒரு சூட்சமம்
அல்லது முடிவிலி ....